Азық-түлік бағасы шарықтап тұр. Қала тұрғындарының басым бөлігі қымбатшылық қысып тұрғанын жасырмайды. Күнделікті тұтынып отырған өнімдер құны бір жылда бірнеше рет өсті. Тұрғындар тапқан-таянғандары тамаққа кететінін жасырмайды. Қымбаттаған азық-түлік қатарында күнделікті тұтынатын сұйық май, қант, жұмыртқа бар. Бағаның күн санап өсуін саудагерлер өндірушілердің бағаны көтеруімен байланыстырып отыр. Сондай-ақ, бүгіннен бастап қарақұмықтың бағасы тағы қымбаттады.Десек те ірі сауда орындарының қызметкерлері азық-түлік бағасы тұрақты екенін алға тартты. Олардың айтуынша, жаңа жыл мерекесі қарсаңында қымбаттап кеткен жеміс-жидек, көкөністер қазір арзандаған. Атап айтар болсақ, тропикалық жемістерден де қымбатқа сатылған қиярлардың бағасы мерекеден кейін төмендеген. Қаладағы ірі сауда орындарында пияздың келісі 85 теңге, картоп 161 теңге, қызылша 125, сәбіз 157 теңге. Жемістердің ішінде арзаны алмалар 300-500 теңге аралығында. Сұйық майдың литрі 500-700 теңгені тұрады. Ең арзаны - Шығыс Қазақстанның өнімі. Ал банкадағы Саратов майонезінің бағасы жиырма күнде 20 теңгеге қымбаттаған. Айта кетейік, Қазақстан Ұлттық банкінің мәліметінше, азық-түлік бағасының көтерілуі елімізде ішкі ұсыныстың аздығынан. Тек желтоқсан айындағы инфляция 11,3 пайызды құрады.