Ақтөбедегі оқиғалардан кейін Астанада дін қызметкерлері, теологтар жиі кездесе бастады. Дін істері комитеті жиындар өткізіп, сарапшылар болжамдар мен жорамалдарын ақтарды. Бір топшылау бойынша  "Қазақстанда салафизмнің етек жаюына әлеуметтік ахуал себеп емес. Мемлекет ішінде салафизм идеологиясы мықты." Демек,  дінге бет бұрғысы келген қазақстандықтарға бағыт-бағдар көрсетеді деп сенген  имамдарымыз бен теологтарымыздың ілімі дүмшелердің идеологиясынан төмен болғаны. Тек біздің өңірде ғана емес, жалпы елде жөн білетін мамандар жетіспейді. Жоқтың қасы. Марлен Мүслімов Дін істері комитетінің ғылыми-зерттеу және сараптау орталығында  исламды зерттеу бөлімінің бас ғылыми қызметкері. Елдегі саусақпен санарлық құнды кадрлардың бірі болса керек. "Ақ жол" демократиялық партиясының облыстық филиалы  ой-пікірін тыңдау үшін маманды Ақтөбеге арнайы шақыртты. Ол дөңгелек үстел басында бар білетінін жайып салды. Салафизм идеологиясы -ғұраба. Қазақша ғаріп, яғни оқшаулану. Отбасынан оқшаулану, қоғамнан , мемлекеттен оқшаулану. Олар үшін намазға жығылып, шариғат жолымен жүрмегендердің барлығы жаман. Жамандықты қолмен түзе, көнбесе тілмен айтып түзе, оған да көнбеді ме жүрегіңмен жек көр деген салафишілер ұраны. Құдай атымен басқарылмаған зайырлы мемлекетті лаңкестер құлатуға құштар.