"Мектепке жол қайырымдылықтан басталады." Бүгін облыстық ішкі істер департаменті осындай атаумен акция ұйымдастырды. Ақтөбелік полиция қызметкерлері бір күндік жалақыларын жинаған. Сөйтіп, полицей аға-апалары 150-ге жуық баланы қуантқалы отыр. 5 млн.теңге өңіріміздегі үш мекемеге бөлінді. Олар - Алға балалар үйі, Жайсаң арнайы білім беру ұйымы мен облыстық кәмелетке толмағандарды бейімдеу орталығы. Бұл орталықтардағы балақайлардың барлығы мейіріммен қатар, материалдық көмекке де зәру. Жаңа оқу жылының қарсаңында жасалған көмекке аталған мекемелердің педагогтары ризашылық білдірді. Себебі, санаулы күннен кейін мектепке баратын балалардың оқу құралдары жоқ. Киім-кешек те қажет. Тәртіп сақшыларына зор алғысын білдіргендердің бірі облыстық кәмелетке толмағандарды бейімдеу орталығы. Қазір мұнда 20-ға жуық бала тұрып жатыр. Қыркүйекте бала саны көбейеді. Алға балалар үйінің 19 тәрбиеленушісін осында ауыстырмақ. Олардың барлығы да мектеп жасындағы балалар. Ал облыстық ішкі істер департаменті тарту еткен 2,5 млн. теңге осы бүлдіршіндердің киім-кешегі мен оқу құралдарына жұмсалмақ. 5 млн.теңге. қаржыны Алға балалар үйі, Жайсаң арнайы білім беру ұйымы мен облыстық кәмелетке толмағандарды бейімдеу орталығы ертеңнен бастап жұмсай алады. Тәртіп сақшыларының дәстүрлі қайырымдылық шарасы "Мектепке жол" жалпыреспубликалық акциясы аясында ұйымдастырылды.