Аймақтағы екі апаттық мектеп мәселесі биыл шешіледі
Жаңа оқу жылында өңір мектептерінде 189 мыңнан астам оқушы білім алады. Оның ішінде 19 мыңнан көбі – мектеп табалдырығын алғаш аттайды. Аймақта барлығы 441 мектеп жұмыс істейді. Бұл туралы бүгін өңірлік коммуникациялар қызметі алаңында айтылды. Облыстық білім басқармасының басшысы Бұлбұл Күзембаеваның мәліметінше, 401 мектепте тегін ыстық тамақ ұйымдастырылып, 79 мыңға жуық оқушы қамтылады. Аймақтағы 19 білім беру ұйымында күрделі жөндеу жұмыстары жүргізіліп жатыр. Аймақта 2 апаттық мектеп бар. Олар Шалқар ауданындағы Бозой орта мектебі мен Темір ауданындағы Кереев мектебі. Қазір қос білім мекемесінде құрылыс жұмыстары жүріп жатыр. Облыстың бас ұстазы алда апатты мектептердің мәселесі толық шешіледі дейді. Одан бөлек өңірде үш ауысымды үш білім ордасы бар. Үшеуі де облыс орталығында. Олардың да мәселесі "Келешек мектептері" есебінен жыл соңына дейін шешілетін болады. Өңірде мұндай 4 жаңа мектеп салынып жатыр. Техникалық және кәсіптік білім беру жүйесінде 40 колледжде 28 мыңнан астам студент білім алуда. Мемлекеттік тапсырыс көлемі арттырылып, жұмысшы мамандықтарына басымдық берілді. Өңірде 640-қа жуық мектепке дейінгі ұйым бар. 45 900-ден көп бүлдіршін қамтылған. Оның 49%-ы жекеменшік балабақшаға барады. Аймақта биыл 1038 орынға арналған 14 жеке балабақша ашылған. Шаһарда 238 балабақша ваучерлік қаржыландыру жүйесіне көшті.Количество показов: 26
Дата создания: 21.08.2025 08:51:12
