Аймақ басшысы депутаттарға есеп берді

Облыс әкімі Асхат Шахаров бүгін депутаттар алдында есеп берді. Ол өз баяндамасын аймақтың былтырғы экономикалық өсім көрсеткішімен бастады. Өткен жылы облыстағы экономикалық өсім 100 пайыздан асқан. Дегенмен, 2024 жыл - өңір үшін шығынсыз болмады. Өткен көктемдегі су тасқыны өңір тарихындағы ең апатты жағдайлардың бірі болды. 4000-нан астам үй, 47 шақырым жол мен 20 көпір зардап шекті. Залалды өтеу үшін мемлекеттік бюджеттен 11 млрд 600 млн теңге бөлінді. Былтыр шаһарда Есет батыр шағын ауданында 138 пәтер ел игілігіне берілді. Аймақ басшысының баяндауынша, аталған тұрғын алапта биыл 9 млрд 2 млн. теңгеге 2 мың пәтер салынып жатыр. Жыл соңында 10 үйдің және Жанақоныс тұрғын алабында 140 пәтерлі жатақхана пайдалануға берілуі мүмкін. Баспаналар кезекте тұрған тұрғындарға беріледі. 2024 жылы Ақтөбеде 120 шақырым автожол төселді. ТКШ бөлімінде жалпы құны 13 млрд теңгеге тағы 18 жобаны жүзеге асыру жоспарланған. Қатарында Кірпішті, Қызылжар-3 тұрғын аудандарында жол салу және 9 мектепке кіреберіс жолдар бар. Өңір басшысына облыстық мәслихат депутаттары сауалдарын қойды. Депутат Боран Ізбасов аймаққа инвестиция тарту жоспарының орындалуын сұрады. Бұл сұраққа жауап берген өңір басшысы шетелдік инвесторларды тартуға ерекше көңіл бөлініп жатқанын айтты. Биылғы жылдың басынан бері 590 млрд теңге инвестиция тартылған. Былтыр өңір халқының 99 пайыздан астамы ауыз сумен қамтылған. Құны 2 млрд теңгеден асатын 6 жоба іске асты. Биыл 10 ауыл орталық су жүйесіне қосылады. Одан бөлек, былтыр ауыл шаруашылығы басқармасы шаруа қожалықтарын қолдауға 32 млрд теңге бөлді. Биыл жиналған астық көлемі 550 мың тоннаны құрауы тиіс, бұл өткен жылмен салыстырғанда 40 мыңға артық. 
Количество показов: 23
Дата создания: 28.08.2025 01:29:21