Шаһарда қазір 300-ден астам автобус жолаушылар тасымалдап жүр. 140-тан көбі "Қалалық жолаушылар автокөлік кәсіпорыны" ЖШС-іне тиесілі. Бүгін автобустарды қоғамдық бақылау тобы қарап шықты. Түске дейін жүргізілген тексеру нәтижесінде қоғамдық көліктердің бірде бірінде мүмкіндігі шектеулі жандарға жағдай жасалмағаны анықталды.Дегенмен, автоубстардағы зағиптар мен құлағы мүкіс жандарға арналған арнайы басқыштары істен шыққан болып шықты. "Нұр Отан" партиясы облыстық филиалы, қоғамдық бірлестік өкілдері, "Пандус ОК" ЖШС-нің директоры Шаһан Жолдасбаев "Автопарк" ЖШС-нің №24, 26, 12-ші, "Қалалық жолаушылар автокөлік кәсіпорыны" ЖШС-нің №1, 8,16 бағыттарындағы автобустарды тексерді. Барлығында кемшілік бір.
Өткен жылдың маусымында қаламыздағы жолаушылар автокөлік кәсіпорыны су жаңа 70 автобуспен толыққан еді. Елде шығарылған экологиялық таза автобустарды қала тұрғындарына облыс әкімі Бердібек Сапарбаев көрсеткен еді. Мүгедектер үшін ыңғайлы жылжымалы пандусы бар жолаушылар көлігін мақтанышпен таныстырды. Осы жылжымалы пандустың бүгінгі тексеру кезінде біреуі де жоқ болып шықты. Алынып тасталған. Ал, Шаһан Жолдасбаев жылжымалы пандустардың неліктен алынғанын білемін дейді. Оның ойынша, арбаға таңылған мүгедектер автобустардың уақытын алып, жолын бөгейтіндіктен жылжымалы пандустарды алып тастаған. Бірақ, автобусқа арбамен міну үшін бар-жоғы 2 минут уақыт қажет дейді. Шаһанның сөзінше, бір жылжымалы пандустың құны 1,5 млн. теңге тұрады. Ал, былтыр мұндай көтерілгіш құралы бар 70 автобус сатып алынған болатын. Демек, оларды пандуспен жабдықтау үшін шамамен 100 млн. теңгеден астам қаржы жұмсалды. Бүгінде автобустардың қаншасында пандустың бар-жоғы белгісіз. Ал, шаһардағы жолаушылар тасымалына жауапты қос мекемеге қоғамдық бақылау тобы 1 ай бұрын тексеру жүретіндігі туралы ескерту жасаған.