Қаладағы жолаушылар автобусында ақшамен есеп айырысу жүйесі жойылатын күн алыс емес. Стационарлық және мобильді валидаторлардың қызметі жолға қойылмақ. Бұл туралы бүгін "Smart Avtobus Aqtobe" ЖШС-нің директоры Қанат Дженғалиев мәлімдеді. Электронды төлем жасауға мүмкіндік беретін транспорт картасы сатылымға шыққан. Құны 450 теңге тұратын карталарды қоғамдық көліктерде сатып алуға болады. Шаһардың қоғамдық көліктерін электронды жүйеге көшіру әдісіне облыс әкімі Оңдасын Оразалиннің өзі мұрындық болып отыр. Өңір басшысы жаппай сандық жүйені енгізуді ұзатпауға тапсырма берген. Қала халқын қоғамдық көлікпен қамтып отырған қос мекеменің қарамағындағы автобустарға валидатор құрылғыларын орнатумен әзірге "Smart Avtobus Aqtobe" ЖШС-гі айналысуда. 70 аппарат орнатылып болған. Серіктестік қалалық жолаушылар тасымалы мекемесімен қоян-қолтық жұмыс істеп жатыр. "Автопарк" ЖШС-гі үлесіндегі 160 автобусқа да мұндай құрылғылар орнатылады. Айта кетелік, транспорт карталарын автобустар ішінде кондукторлардан сатып алуға болады. Ұялы телефон сататын дүкендерде де болады. Үлкендерге арналған карта көк, балалар үшін жасыл түсі беріледі. Әлеуметтік көмек алатындар санатындағы азаматтарға жеңілдіктер сақталады. Бұрынғысынша өзге төлем карточкаларымен де есеп айырыса беруге болады. Транспорт карталарына ақшаны қалауыңызша енгізуге болады. Мерзімі де шектеусіз. Бір рет сатып алған картаны бірнеше жыл қолдануға болады. Қаланың барлық қоғамдық көліктерінде картаны іске қосу жүйесі түсіндірілген парақшалар қазірден бастап іліне бастаған.