Ұзын жолға да ішімдік ішіп шығатын жүргізушілер бар. Жолаушылардың басын бәйгеге тігетіндер сапарға аттанар алдында не автобусын техникалық байқаудан өткізбейді, не өзінің денсаулығын тексертпейді. Әсіресе тас жолда жылдамдықты шамадан тыс арттыратындары көп болып шықты. Бұл деректер "Автобус" жедел алдын алу шарасы кезінде анықталды. 1 ай бойы жол-патрульдік полициясы мен көлік инспекциясының қызметкерлері күшейтілген тәртіпте жұмыс істеді. Облыста жол қауіпсіздігі ережесін бұзуға қатысты 846 дерек тіркелді. Анықталғаны, ұзақ жолда жүргізушінің құлағынан ұялы телефон түспейді екен. Рөлде отырып, телефонмен сөйлескен 164 автобус жүргізушісі назарға іліккен. Одан кейінгі орында жылдамдықты шамадан тыс асыру тұр. Жедел профилактикалық шара кезінде 106 "шумахерге" хаттама толтырылған. Тағы ең көп бұзылатын ереже маневр жасау қағидасы. Алдындағы көлікті басып озу, алдын кесу секілді әдістерге салып, жолда апат тудыра жаздаған 70 автобус жүргізушісі жауапқа тартылған. 72 адам жүргізуші куәлігінсіз рөлге отырған. Барлығының да үстінен әкімшілік хаттама толтырылып, тиісті жаза қолданылған.