Биыл өңірдің мәдениет саласына бөлінген 3 миллиард теңгеден аса қаражат мақсатты жұмсалды. Облыстық мәдениет, архивтер және құжаттама басқармасы биыл пандемияның барлық талаптарын сақтай отыра 15 мыңнан аса іс-шараны дәстүрлі форматта, 8 мың жиынды онлайн өткізген. Басқарма құрамына 236 кітапхана, 19 мұражай, 2 мемориалдық кешен, 22 коворкинг орталығы, 2 кәсіби театр, 13 архив мекемелері кіреді. Басқарма басшысы келер жылы төрт ауданда жаңа архив ғимараттары бой көтеретінін жеткізді. Мәдениет саласында өңірде 3 мыңнан аса адам еңбек етеді. Биыл өңірімізде Бәкір Тәжібаевтың 95 жылдығы, Мұқағали Мақатаевтың 90 жылдығы, Кердері Әбубәкірдің 160 жылдығы, Жамбыл Жабаевтың 175 жылдығы тойланды. Осы секілді мәдени-көпшілік шараларды атап өтуге 276 млн теңге бөлінген. Қомақты қаражаттың бір бөлігі облыстық халық шығармашылығы орталығы жанынан "Ер Едіге" жас жыршылар мектебін ашуға жұмсалған. Сондай-ақ, ғашықтар аллеясында еліміздің дарынды тұлғалары Төлеген Айбергенов пен Шәмші Қалдыаяқовтың ескерткіштері бой көтерген. Қазір 236 кітапхана жұмыс істеп тұр. Қала мен аудандарда 3 млн-нан аса кітап қоры бар. 236 мыңнан аса тұрақты оқырман кітапханашылармен тікелей байланыста. Соңғы екі жылда онлайн оқырмандар саны артқан. Электрондық жүйені 49 мың ақтөбелік пайдаланады. Кітап сатып алуға 1 млн-нан 3 млн теңге арасында ақша бөлініп тұрады. Биыл өңірге 15 мың 983 жаңа кітап келген. Облыс мұражайларында 189 мыңнан аса жәдігер сақтаулы. Биылдыққа 7 этнографиялық қазба жұмыстары жүргізілген. Бұл жұмыстар өз жемісін беріп отыр. Өңірде "Алтын адам" қорымы табылды. Оны қайта қалыпқа келтіру жұмыстары ойдағыдай атқарылған. 45 тарихи ескерткішке QR код қойылған. Мұндай жұмыстар 2022 жылы да өз жалғасын таппақ. Хромтау ауданының Көктау ауылында, Мәртөк ауданының Қаратоғай ауылында ауылдық клуб бой көтереді. Қала іргесіндегі Жаңақоныс ауылында мәдениет үйі құрылысына 169 млн теңге бөлініп отыр. Бөгетсай ауылындағы мәдениет үйі, Қобда ауданының Ақраб ауылындағы мәдениет үйі күрделі жөндеуден өткізіледі.