Облыс әкімі Бердібек Сапарбаев бүгін ауыл шаруашылығы саласының мамандарымен кездесті. Президент Нұрсұлтан Назарбаевтың "Қазақстандықтардың әл-ауқатының өсуі: табыс пен тұрмыс сапасын арттыру" тақырыбындағы жолдауын талқылады. Жолдаудағы тапсырмалар мен саладағы мәселелерді шешу жолдарын қарастырды. Өңір басшысы Бердібек Сапарбаевтың сөзінше, жыл сайын ауыл шаруашылығы өнімдері артып келеді. Соңғы 9 айда аймақта 157 млрд. теңгенің өнімі шығарылған. Былтырғы көрсеткіштен 4 пайызға көп. Қазір облыста майлы дақылдар әлі жиналып жатыр. Бүгінге дейін 514 мың тонна астық жиналды. Жыл басынан бері өңірдегі ауыл шаруашылығы саласына 15 млрд. теңге инвестиция салынған. Ауыл шаруашылығы өнімдерін өңдеу басты мақсат дейді аймақ басшысы. Қазір құны 47 млрд. теңге болатын 81 инвестициялық жоба жүзеге асырылып жатыр. Экспортталатын өнімдер саны да артуы тиіс. Бүгінге дейін 2000-нан астам ауыл шаруашылығы өнімі экспортталған. Мал шаруашылығы өнімдері көп. Қазір облыста суармалы жерлерге көп көңіл бөлініп жатыр. 2025 жылда облыстағы суармалы жер көлемі 100 мың гектарға жетуі тиіс. Келесі жылы олардың көлемін 40 мың гектардан арттыру көзделіп отыр. Қазір облыста 6200 ауыл шаруашылығы құрылымы бар. 32 мыңдай адам жұмыс жасайды. Отырысқа қатысқандар осы саладағы кәсіпкерлерді жұмысшылардың жалақысын кешіктірмеуге және негізсіз қысқартпауға шақырды. Облыстағы суармалы жерлердің жағдайына талдау жасалуы шарт.