Мұнайлы өңір үшін экологиялық мәселе күн тәртібінен түскен емес. Қара алтын өндіретін компаниялар жыл сайын заң бұзады, жыл сайын айыппұл төлейді. Көш басында "СНПС-Ақтөбемұнайгаз" бен "Интергаз-Орталық Азия" акционерлік қоғамы мен "ҚазақОйл" серіктестігі тұр. Сонымен қатар, жыл өткен сайын саны артып келе жатқан көліктер де атмосфераны ластайтындардың алдыңғы қатарында тұр. Бұл олқылықтың орнын толтыру үшін соңғы жылдары жүргізушілерді сұйытылған газбен жүруге үгіттеу шарасы қолға алынған болатын. Ал мемлекеттік мекеме көліктерінің барлығы  газбен жүретін болып шықты. Ілеспе газды өңдеу көрсеткіші 95 пайыздан асты. 2017 жылға қарай 97 пайыз болады деген жоспар бар. Экологтар тексеру кезінде 19 кәсіпорынға әкімшілік айыппұл салған. Өңірде қатты тұрмыстық қалдық да жеткілікті деңгейде өңделмейді. Бары - бірер пластика өңдеу орны мен қағаз-картон цехы. Олардың үлесі бар болғаны 0,5 пайызды құрап отыр. Қазіргі кезде жылына 200 мың тонна қалдықты өңдейтін зауыт салу мәселесі әлі ашық тұр. Орны белгіленіп қойған. Жиын кезінде пайдалы қазбаларды заңсыз иемденіп, өз жеке мүддесіне жарататындар да тіркелгені белгілі болды.

Айта кетейік, жыл басынан бері пайдалы қазбаларды заңсыз иемденуге қатысты  6 дерек тіркелді. Бір оқиға бойынша іс қозғалды.