Кеңес әскерлерінің ауған жерінен шығарылғанына 30 жыл. Бүгін қалалық мәдениет үйінде салтанатты жиын өтті. Оған ауған соғысы ардагерлерінің үкіметтік емес ұйымдары мүшелері, ұлы соғыстан оралмаған ата-аналар, жастар қатысты. Облыс әкімі Бердібек Сапарбаевтың құттықтауын облыстық ішкі саясат басқармасының басшысы Бұлбұл Орақова жеткізді. 30 жылдыққа мерейтойлық медаль әзірленген. Төсбелгіні азаматтарға облыстық қорғаныс істері жөніндегі басқарма бастығы Сейіткерім Арапбаев пен облыстық ішкі саясат басқармасының басшысы Бұлбұл Орақова табыстады. Қазір облыста Ауған соғысына қатысқан 992 адам қалып отыр. Оның 58-і мүгедек. Төртеуі бірінші топтағы мүгедек. 18-19 жастарында соғыс көрген ағалардың бүгінде алды алпысқа толып жатыр. Бала өсіріп, немере көріп отыр. Олардың ұрпақ тәрбиесіне қосып жатқан үлесі мол. Қазақстанда әр ауған соғысы ардагері мемлекеттен 15 мың теңге жәрдемақы алып тұр. Ақтөбеде жылыту маусымында 3500 теңге үстеме ақы қосылады. 60 мың теңге бір реттік жәрдемақы бар. Соңғысын 9-мамыр жеңіс күніне алған. Дәрі-дәрмектері тегін. Госпиталь, шипажайларда ем алып тұрады. Ауған соғысы ардагерлері сол жақта шейіт болған қаруластарының артында қалған ата-аналарына қарайласып отыр. Көбі жалғыз ұлынан айрылған жалғызбасты қария. Қоғамдық бірлестік төрағалары ата-аналардың коммуналдық төлемдерден босатылуын да сұрайды.