Кеңес әскерінің Ауған жерінен шығарылғанына бүгін 28 жыл. Осыған орай, шаһардағы Жауынгер интернационалистерге арналған ескерткіш жанында салтанатты шара өтті. 1979 жылы Ауған жеріне 1700 ақтөбелік бозбала аттанған. Қазір облыста 978 Ауған соғысының ардагері тұрады. Олар естір құлақ табылар деген ниетпен жыл сайынғы шешілмей жүрген мәселелерімен бүгін тағы да бөлісті. Өздерін ҰОС ардагерлерімен теңестірсе дейді. Ауған жерінде қан кешкен ақтөбеліктердің 58-і мүгедек. Бұл тіркелгені ғана. Соғысқа аттанған жерлестеріміздің 26-сы елге оралмады. Біреуі із-түссіз жоғалғандар қатарында. 18 жастарында майданға аттанып, қанды қырғынды көргендер бүгін қаза болған қарулас жолдастарын үнсіз еске алып, ескерткішке гүл қойды. Кейін интернационалист-жауынгерлер мен жат жерде мерт болғандардың туыстары қабір басына барды. Дұға қылып, гүл қойды. Жастарды отансүйгіштікке тәрбиелеп, бойларына патриоттық рух ұялатып жүрген Ауған соғысының ардагерлері мен белсенділер бүгін Астанадан жеткізілген арнайы грамоталармен марапатталды.