Бүгін ауған соғысының ардагерлері қаза тапқан қаруластарын еске алды. Шара қаладағы жауынгер-интернационалистер ескерткішінің алаңында өтті. Сондай-ақ, Тәуелсіздік мерекесіне орай көп жылдар бойы пәтер кезегінде тұрған ардагерлерге баспана кілті табыс етілді.Бұл - Тәуелсіздіктің арқасында келген сый. Осылай деген ауған соғысы ардагерлерінің қуанышында шек жоқ. Жаңа жылды жаңа баспанада қарсы алатындарын айтты. Он бес жылдан бері пәтер кезегінде тұрған жауынгерлер жағдайларын айтып, облыс әкіміне барған. Бұл мәселе бірден шешімін тауып, 20-ға жуық ардагер баспаналы болды. Олардың көбі бұған дейін жалдамалы пәтерде тұрған. Баспаналы болғандардың бірі - Нұрбол Касенов 1985 -87 жылдары Джелалабадтың Нангархар провинциясында әскери борышын өтеген. Әу баста оған әскери комиссариат Прежевальскіге жолдама берген. Бірақ 18 жастағы бозбала Ауғанстандағы соғысқа өзі сұранып барған. Қазір 53 жастағы ардагер отбасының қамы үшін екі жерде жұмыс істейді. 21 жылдан бері жалдамалы баспанада тұрады.Ардагерлер ауған соғысында қаза тапқандарды еске алып, бір минуттық үзіліс жариялады. Жиналғандар ескерткішке гүл шоқтарын қойды. Айта кетейік, қазір облыста 900 ауған соғысының ардагері бар.