Бүгін Қазақстан парламентінің бірлескен отырысында сенат төрағасы Қасым-Жомарт Тоқаев Қазақстан президентінің өкілетін қабылдап, ант берді. Отырысқа елдің тұңғыш президенті Нұрсұлтан Назарбаев, үкімет мүшелері, президентке тікелей бағынатын және есеп беретін мемлекеттік органдардың басшылары, Қазақстанда тіркелген шетелдік миссиялардың басшылары, сенат пен мәжіліс депутаттары қатысты. Орталық сайлау комиссиясының төрағасы Берік Имашев Қасым-Жомарт Тоқаевқа президент куәлігі мен кеуде белгісін, Президент штандарты мен "Алтын қыран" орденін тапсырды. Ант беру рәсімінен кейін Қасым-Жомарт Тоқаев Қазақстан президенті ретінде алғаш рет сөз сөйледі. Ол кеше тарихи шешім қабылдаған Нұрсұлтан Назарбаевтың елді қалыптастырудағы рөлін жоғары бағалады. Назарбаевтың экономикаға инвестиция тарту тәжірибесінің арқасында Қазақстан бұрынғы кеңес елдері арасында жан басына шаққандағы тікелей инвестиция жөнінен көшбасшы екенін атап өтті. Елімізге 300 млрд доллардан астам инвестиция әкелінген. Қасым-Жомарт Тоқаев стратегиялық шешімдер қабылдау кезінде Нұрсұлтан Назарбаевтың пікірі басым мәнге ие болатынын мәлімдеді. Назарбаевтың ел тарихындағы рөлін ерекше бағалап, елордасы Астананың атауын Нұрсұлтан деп өзгертуге ұсыныс жасады. Және барлық облыстық қалалардағы басты көшелерге Нұрсұлтан Назарбаевтың есімін беруді, тұңғыш президенттің құрметіне астанада монумент орнатуды ұсынды. Құрметті сенатор мәртебесін берді. Тұңғыш президент ретінде Нұрсұлтан Назарбаевтың барлық қызметтік инфрақұрылымы сақталады. Және Қазақстанның тарихындағы жалғыз Елбасы болып қалады. Тоқаев билікті бұлайша кикілжіңсіз тапсыру халқымыздың парасаттылығын көрсетіп, келер ұрпаққа жақсы үлгі болады деп атап өтті. Қасым-Жомарт Тоқаев Нұрсұлтан Назарбаевты саяси ұстазым деп атап, «Алтын жұлдыз» орденімен марапаттап, "Халық қаһарманы" атағын берді.