Тілшілермен кездесуге бас прокуратура, ұлттық экономика, дін істері және азаматтық қоғам, денсаулық сақтау және әлеуметтік даму вице-министрлері келді. Министр орынбасарлары кез келген сұраққа жауап беруге дайын екенін көрсетті. Сонымен қатар, жиында лаңкестікке қарсы орталық штабының басшысы Жанат Сайполдаев та болды. Ал жұмыс тобының құрамында деген ішкі істер министрінің орынбасары Ерлан Заманбекұлы бұл жерде төбе көрсетпеді. Астанадан келген мамандар Ақтөбені зерттеп, қылмыстың алдын алуға не кедергі екенін білмек екен. Елордалықтар елімізде алғаш Ақтөбеден басталған кешенді жұмыстың нәтижелі болатынына сеніп отыр. Тіпті методикасын әзірлеп, өзге өңірлерде қолданбақ.

Ақтөбедегі лаңкестік оқиғаға не себеп?  Өңірге келген мамандар бұл сауалға жауапты кеңседе отырып емес, адамдармен кездесу арқылы іздеп, мәселені шешпек. Тіпті, жат ағым жетегінде жүрген адамдармен, сотталғандармен де кездесу жоспарланған.Ал осыдан 15 күн бұрын құрылған ҚР Дін істері және азаматтық қоғам министрлігінің өкілдері халықпен кездесіп, мешіттерді қарап шықпақ. Имамдар оқытылып, пітір садақалардың мақсатты пайдаланылуы тексеріледі. Білекті түріп,  іске кіріскен топ өз жұмысын бір айдан соң қорытындылайтын болды. Себебі, олар тілшілер қойған көп сұраққа  анықтаймыз, шешеміз дегеннен өзге мардым жауап таба алмады.  Сонымен қатар, 5-ші маусым күні журналистерге қандай да бір ақпарат беруге қарсы болған облыстық  ішкі істер департаментінің жұмысы терсеріледі. Белгілі болғаны, ақпаратты жасырын ұстағандар жазасын алып үлгерген екен.