Ақтөбеге келген астаналық мамандар осы аптада бір айлық жұмыстарын  қорытындылайды. Тексеруге емес, мониторинг жүргізіп, талдау жасауға келген мамандар аудан орталықтарын ғана емес, шалғай ауылдарды да аралап жүр. Тіркелген заңсыздықтар жетерлік. Бас прокуратура өкілі Бағдат Семейовтың айтуынша, Шалқар, Темір, Мұғалжар, Алға аудандарының 12 мекемесі 2 айдан 6 айға дейін жұмысшыларына жалақы төлей алмай отыр. Себебі, өнім өтпейді, сұраныс азайды. Ал Денсаулық сақтау және әлеуметтік даму министрлігінің еңбек, әлеуметтік қорғау және көші-қон комитеті бес ауданды аралап, халыққа Еңбек кодексін түсіндірген. Жұмыс беруші мен жұмысшы арасындағы құжатсыз келісімнің жолы кесіліп, 3 адам еңбек келісім шартын жасаған. Ақтөбеге келген жұмыс тобы 7 бағыт бойынша аудан, ауылдарын аралап жүр. Әлеуметтік сала жұмыс тобы 29 мекеме басшысымен, 1700-ден астам жұмысшымен кездесті. Сонымен қатар, ауыл, аудан халқының мемлекеттік жәрдемақыны толық көлемде алмай келгенін анықтады. Жұмыс тобы мұны жергілікті әкімдік өкілдерінің қателігі деп санамайды. 29-шы қыркүйек күні Ақтөбеге жұмыс сапарымен келген астаналық 200 маман жұма күні талдау шарасын аяқтауды жөн көріп отыр.