"Астана" саябағы алдағы төрт жылда жасыл-желекке орануы тиіс. Бүгін орталық саябақты аралап көрген қала әкімі аяқталмаған демалыс орнының құрылысымен айналысып жатқан мердігер мекемеге нақты тапсырмалар берді. "Ақтөбеспецстроймонтаж" компаниясы саябаққа отырғызатын шырша мен бұталарды сонау Татарстаннан жеткізген. Құрылысы былтырдан бері жүріп жатқан саябақты жайқалған жасыл желекке көмкеруге уақыт керек секілді. Оның үстіне биыл жауын-шашын аз. Қала бойынша ағаштарға күтім жасап, кесуге 30 млн теңге бөлінген. Ағаштардың бұталарын қию жұмыстары жылда орындалады. Жаппай кесу жұмыстары дәл осы саябақта да жүргізілді. Былтыр "Астана" қаласының мерейтойына сыйлық ретінде жедел тұрғызылған саябақтың құрылысы кезінде біраз ағаш оталғаны рас. Қазір ашық алаңқайда күн сәулесінен қорғанар бір де бір тал көрмейсіз. Қазір шаңы шығып жатқан саябақта кесілген ағаштардың орнына кеспе тастар төселіп жатыр. Жоспар бойынша үлкен субұрқақ пайда болмақ. Жоспарға сай саябақтың 60 пайызы жасыл желекпен көмкерілуі тиіс. Шыбықтар отырғызылып жатыр.