"Қазақстанның Ұлттық банкінің" облыстық филиалы таратылған «Астана» банкінің салымшыларына ақша төлеу тәртібін түсіндірді. Бұған дейін банкті тарату туралы сот шешімі заңды күшіне енген болатын. Жұмысы тоқтаған "Астана" банкінің өңірдегі 5 мыңнан астам салымшысына қаржылары түгел қайтарылады. "Астана банкі" АҚ былтыр 26 қарашада сот үкімімен мәжбүрлі түрде жұмысын тоқтатты. Ал, 9-қаңтарда ҚР Ұлттық банкі "Астана банкі" АҚ тарату комиссиясын тағайындап, агент банк ретінде "Еуразиялық банк" АҚ бекітілді. Ел бойынша банктің 275 мың салымшысы бар. Оларға 40 млрд. теңгеге жуық қаржы қайтарылуы керек. Ал, жұмысы тоқтаған банкте 5 мыңнан астам ақтөбеліктің 300 млн. теңгесі бар. Түсіндіру жұмыстарына "Еуразиялық банк" АҚ филиалы директоры мен "Астана банкі" АҚ тарату комиссиясы құрылымының облыстағы басшысы қатысты. Олардың сөзінше, сыйақының 9 қаңтардағы жағдай бойынша капиталдандырылған сыйақы сомасына дейін қайтарылады. Салымшылардан өтініш қабылдап, өтемақы төлеу 26-қаңтардан бастап, жарты жылға дейін жалғасады. Еуразиялық банктің кез-келген филиалына барса болғаны. Салымшы алатын қаржыдан немесе Еуразиялық банкке ақшасын аудару жұмыстарынан комиссиялық төлем алынбайды. Салымшы өтемақы алу үшін агент банктің кез келген филиалына жеке басын куәландыратын құжатымен барып, өтініш жасайды. Салымшының сенімді өкілі болған жағдайда нотариалды куәландырылған сенімхаты болуы шарт. Өтемақы төлеуге қатысты шағымдар немесе сұрақтар болса, ақтөбеліктер Ұлттық банк филиалына немесе "Астана банкі" АҚ тарату комиссиясы орналасқан Сәңкібай батыр даңғылы, 249-үй мекен-жайына хабарласа алады.