Ақтөбедегі 3 станцияға қалдық суды төгу енді талондық жүйемен жүргізіледі. Бекеттегі арнайы құдыққа төгілетін кәріз суларының 1 текше метрі үшін 71,8 теңге. Бұл жаңашылдық бүгіннен бастап күшіне енді. Қаладағы ассенизатор көліктерінің жүргізушілері бұған қарсы. Себебі, бұрынғыдан көп шығындалады. Бүгін Кірпішті ауылындағы төккі бекетінің қасында көлік жүргізушілері наразылықтарын білдірді. Бұған дейін "Ақбұлақ" АҚ белгілеген арнайы құдықтарға кәріз суын төккені үшін әр көлік жүргізушісі 15 мың теңге ғана төлейтін. Яғни ассенизатор иесі қанша рейс жасаса да көлік көлеміне қарай 15, 20, 25 мың теңге төлеп келді. Бұл жүйе бүгіннен бастап өзгерді. Жаңашылдыққа жүргізушілер қарсы. Бүгін 100-ге жуық ассенизатор көлігінің иелері Кірпішті ауылындағы бекеттің қасына жиналды. Жүргізушілермен кездесуге облыстық табиғи монополияларды реттеу, бәсекелестікті және тұтынушылардың құқықтарын қорғау департаменті басшысының орынбасары Нұрлан Болатбаев келді. Мән-жайды түсіндірмек болды. Оның сөзінше, кәріз суларын сору тарифі 2015 жылдан бері өзгермеген. Қаладағы кәріз суларын төгетін үш бекеттің екеуі былтыр, бірі биыл салынған. Ол үшін бюджеттен 300 млн теңге жұмсалған. Бүгінгі өзгерістен кейін көлік жүргізушілері кәріз суын сору ақысын көтеретіндерін жеткізді. Осылайша, енгізілген жаңашылдықтың салдарынан қарапайым халықтың қалтасына күш түсетіні анық. Себебі, тұрғындар төлейтін ақыны көлік жүргізушілерінің өздері қояды. Бақылап жатқан адам жоқ.