5-ші мамырдан бастап мейрамханалар ашылады. Еліміздің бас мемлекеттік санитар дәрігері Ерлан Қиясовтың жаңа қаулысына сәйкес, «Ashyq» пилоттық жобасын қолдану арқылы театрлар мен караокелердің, банкет залдарының қайта жұмыс істеуіне рұқсат берілді. Республика аумағында «Ashyq» жобасы жеті өңірде ғана жұмыс жасайды. Бұл тізімге Ақтөбе облысы да кіреді. Жаңа қаулыға сәйкес, бүгіннен бастап кинотеатрлар, театрлар және филармониялар, асхана, фаст-фуд, стрит-фуд үлгісіндегі нысандарды қоспағанда қоғамдық тамақтану нысандарының қызметі жанданды. Ал, 21-ші сәуірден бастап облысаралық және қалааралық туристік тасымалдар жүзеге асырылып, бильярд клубтары, концерт залдары тұрғындарды қабылдай алады. 5-ші мамырдан мейрамханаларда 50 адамға дейін қонақ шақырып, банкет залдарын жалдауға рұқсат берілген. Қала бойынша банкет залдарындағы мерекені ұйымдастыратын 268-ге жуық ірі және орташа нысандар жұмыс жасайды. Былтырдан бері қызметін уақытша тоқтатқан немесе жеткізіп беру саласына машықтанған нысандар бүгіннен бастап алдағы 20 күн ішінде қайта ашылуға қамдана бастаған. Талапқа сай барлық кәсіпкерлік нысандары «Ashyq» пилоттық жобасын қолдануға үйретілуде.
26-шы сәуірден бастап кәсіпкерлік нысандарында «Ashyq» пилоттық жобасын іске асыру барлық өңірлерде жүргізіле бастайды. Пилоттық жобаны йога орталықтары, фитнес-клубтарда, спа-орталықтарда, сауналар мен бассейндерде, "PlayStation" клубтарында, компьютерлік, боулинг клубтарда қолдану қарастырылып жатыр. Цифрлық мониторинг ретінде QR-код қолданылады. QR-код бизнес субъектісіне беріледі. Кәсіпкерлер жеке QR-кодты "InfoKazakhstan.kz" платформасы арқылы ала алады. Қоғамдық тамақтану, сауда орталықтары, базар немесе ауладағы дүкенге барып, Аshyq-ты қолданудың әзірге ешқандай қажеттілігі жоқ. "Ashyq" қосымшасы QR-код және ПТР тесті базасымен қоғамдық орынға келушінің ковид-статусын анықтауға мүмкіндік береді.