Әлеуметтік желіні жайлап алған қаржылық пирамидалар қарапайым халықтың қалтасын қағуда. Қазір облыстың өзінде бірнеше қылмыстық топтар әшкереленіп, олардың ісімен құқықтық органдар айналысуда. Алаяқтар адам алдаудың басқа жолына көшкен. Әлемге әйгілі қаржылық ұйымдардың атын жамылып, талай адамды сан соқтырған әккі топтар толастар емес. Бүгін бірнеше құзырлы мекемелердің өкілдері қаржы пирамидаларының жолын кесу мәселесін талқылады. Заңсыз ақша айналымдары бойынша тексеру жүргізген прокурорлар қылмыстық істер банк қызметкерлерінің араласуымен жүзеге асатынын айтады. Сондықтан құқық қорғаушылар қаржылық операциялардың заңдылығын анықтау үшін қаржы орталықтарындағы әрбір кассаны тексеруді ұсынды. Ал, қолындағы бар қаражатын аудара салып, пирамидалық топтарға жем болған қарапайым халықтың ақшасын кері қайтару да оңай емес. Ұйымдасқан алаяқтық топтар қарапайым халықты ғана емес, банк қызметкерлерін де оп-оңай алдап кете алады. Әртүрлі жалған құжаттарды дайындап, тіпті еш жерде жұмыс істемейтін адамды банкке апарып, үлкен мекеменің жетекшісі деп таныстырған. Сөйтіп, заңсыз қаржылық операциялар жүзеге асырылады. Өздерін құнды металл, валюта нарығы бойынша жұмыс істейтін ірі компания өкілдігі деп таныстыратын қылмыстық топтар да көбейіп кеткен. Олар өз құрбандарын әлеуметтік желіден табады. Олардың жарнамасы бойынша компания капиталына қаржы құйған инвестор ақшаның астында қалады. Осындай жалған ақпаратқа сеніп қалып, миллиондаған қаражатынан айырылып қалған бес адам қаржы нарығын реттеу және дамыту агенттігіне шағымданыпты. Соңғы кездері осындай жалған компанияларға алданып қалған адамдардың арыздары бойынша тексеру жүргізіліпті. Тексеру кезінде ондай компаниялар нарықта болмай шыққан. Сондықтан , қаржы нарығын бақылаушы мамандар алдымен компанияның лицензиясының бар жоқтығын білу керек дейді. Ол үшін алдымен құзырлы орындарға барып, инвестиция құюды ұсынған мекеменің қаншалықты заңды жұмыс істеп жатқанына көз жеткізіп алған абзал.