Ұлы Отан соғысының ардагерлері құттықтау қабылдап жатыр. Бүгін облыстық ЖИТС-ке қарсы күрес орталығының ұжымы ардагер Ажар Оразғалиеваның үйіне барып, құрмет көрсетті. Зенитші Ажар апай жеңісті Берлинде қарсы алған. Сол қуанышты күн қарияның әлі есінде. Ажар Оразғалиева 1942-жылы соғысқа өзі сұранып аттанған. 18 жастағы бойжеткен Атырау стансасында тұрған сталинградтық пойызға мініп, кете берген. 416-шы зенитті артиллериялық дивизионның қатарына қосылып, нағыз соғысқа бір жылдан соң Курск қаласында араласқан. Курск доғасындағы шайқастан кейін, зенитші Ажар әженің полкі Орел, Харьков, Брянск қалаларын азат етуге қатысты. Киев майданында болып, әрі қарай Румыния, Германияға асып кетті. 1945-жылдың көктемін Ажар әже Берлинде қарсы алған. Жасы тоқсанның төртеуіне келген ардагердің кеудесі медальға толы. "Киевті, Белорусьті, Курскты азат еткені үшін" наградалары, "Германиядағы Жеңісі үшін" медалі бар. Бүгін Ажар әжені облыстық ЖИТС орталығының дәрігерлері алғыс хатпен марапаттады. Соғыстан кейінгі жылдары Ажар әже Атыраудағы техникумда, балабақшада басшылық етті. Жетпісінші жылдары отбасымен бірге Ақтөбеге қоныс аударды. Оның жұбайы - Ғабидолла Оразғалиев те Ұлы Отан соғысының ардагері. Ол кісі осыдан он жыл бұрын қайтыс болған. Ажар әжейдің он баласынан тараған 12 немере, 15 шөбересі бар. Өкініштісі, төрт ұлы да дүниеден озған. Қазір қария үлкен қызының қолында тұрып жатыр.