Ақтөбеліктер Арбатқа да жиналды. Ұлыстың Ұлы күнінде бір-біріне ақ тілектерін жаудырып, төс түйістіріп жатыр. Ерекше мерекелік көңіл-күй сезіледі. Қобыланды батыр атындағы орталық стадион алдына бірнеше киіз үй тігілген. Облыстық дін істері басқармасы мен "Аңсар" ақпараттық талдау орталығы тіккен үйдің есігі айқара ашық. Тұрғындар емін-еркін кіріп, астан ауыз тиді. Ақсақалдардан бата алды. Арбатта қайырымдылық шаралары да өтіп жатыр. Шаһардың қайырымды жастары да ақтөбеліктерді ұлы мерекемен құттықтап, тілектерін білдірді. Жастар жүректерге жылылық ұялатып, бауырмалдық пен бірлікті дәріптейтін Наурыз мейрамын әлемдік деңгейде атап өту қажет деп есептейді. Замандастарын елде өтіп жатқан "Ел үлесі пәтерге" акциясына қатысуға шақырды. Қайырымдылық шарасы өңірдегі бір мұқтаж жанға баспана алып беру мақсатында басталған. Орталық стадион алдында тұрғындарға арнап, шаһардағы колледждердің студенттері мерекелік концерт тарту етті. Ақтөбеліктер гір тасын көтеріп, арқан тартысты. Тіпті, қой көтеріп жарысты.