Ақтөбеде жолдардағы ойық-шұңқырларды жөндеу жұмыстары басталды. Жер әбден кепкенше жұмысшылар шұңқырларға тас толтырып, бетін тегістейді. Қаланың ескі бөлігіндегі басты көше - Жаңқожа батыр көшесінің қазіргі көрінісі мынадай. Уәлиханов көшесімен қиылысы ойылып түсіп кеткен. Бұрылған жүргізушілер байқамай қалып, көліктерінің астын соғып алып та жатыр. Беті шұңқырға толы көшелер мұнымен бітпейді. Гришин, Рысқұлов, Маресьев, Мәметова, Әз-Наурыз, Есет батыр, Тургенев, Шәйкенов, тіпті қаланың орталық көшелері саналатын Бөкенбай батыр көшесі де ойлы-қырлы шұңқырларға толы. Әбілқайыр хан даңғылының "Өнер орталығы" орналасқан бөлігі ойылып қалған. Тұрғындардың қала жолдарына қатысты пікірі осындай. Қарапайым халық күнделікті жүрер жолдарының сапалы болғанын қалайды. Биыл жолдардағы шұңқырларды жамауға 208 млн теңге бөлінген. Қазір анық көрініп жатқан шұрық-тесікті жамау жұмыстары әзірге үш ауданда жүргізіледі. Жер кепкенше 12 мөлтек аудандағы шұңқырларға тас толтырылып, тегістеліп жатыр. Жазда күрделі жөндеу жұмыстары Сәңкібай батыр даңғылында жүргізіледі. Даңғыл 6 жолақты болып кеңейтіледі. Оған 600 млн теңге жұмсалмақ. Батыс-2 ауданындағы жаңа көше Мәңгілік ел көшесі де жазда ағымдағы жөндеуден өтеді. Қала көшелерін жөндеуге биыл да қыруар қаржы бөлінді. 3 млрд теңге қала және облыстық қазынадан қарастырылған. Мол қаржыға әсіресе Сәңкібай батыр даңғылы мен Арынов көшесі күрделі жөнделмек. Жолдарды жөндеу жұмыстары жер әбден кепкен мезгіл мамыр айынан басталады.