Апаттан зардап шеккен үш науқас қалаға жеткізіледі

12 адамның өмірін қиған жантүршігерлік жол апаты елді дүр сілкіндірді. Әйтеке би ауданы Белқопа ауылы маңында болған оқиғадан зардап шеккендер Хромтау орталық аудандық ауруханаға жеткізілді. Аман қалған 6 адамның 5-уі жансақтау бөлімінде. 3 науқасты бүгін әрі қарау емдеуге аудандық ауруханадан облыс орталығына алып келеді. Хромтау аудандық ауруханасына апаттан кейін шұғыл түрде қажетті медициналық көмек көрсету үшін облыс орталығынан екі дәрігерлік бригада - ересектер мен балалар дәрігерлері жеткен. Олардың құрамында реаниматологтар, травматологтар, хирургтар және нейрохирургтар бар. Науқастардың жағдайы мен өмірлік көрсеткіштеріне сәйкес хирургиялық операциялар жасалды. Дәрі-дәрмек пен қан компоненттері толық көлемде қамтамасыз етілген. Вице-министр Қанат Бозымбаев Денсаулық сақтау министрлігіне санитарлық авиация арқылы тасымалдауға болатын барлық зардап шеккендерді Астанаға жеткізіп, қажетті ем ұйымдастыруды тапсырды. Дегенмен, басқарма басшының айтуынша, науқастарды Астанаға жіберудің қазір қажеттілігі жоқ. Жол-көлік оқиғасының себептерін жан-жақты тергеумен Ішкі істер министрлігінің арнайы комиссиясы айналысуда, қылмыстық іс қозғалды. Ішкі істер және Көлік министрлігіне «Самара - Шымкент» трассасының қауіпсіздік деңгейін арттыру жөнінде ұсыныстар енгізу жүктелді. Премьер-министрдің орынбасары Қанат Бозымбаев Еңбек және халықты әлеуметтік қорғау министрлігіне және облыс әкіміне қаза тапқандардың отбасыларына барлық қажетті материалдық және психологиялық көмек көрсетуді тапсырды. Айта кетейік, кеше республикалық маңызы бар «Самара - Шымкент» автожолында екі көлік соқтығысып, салдарынан 12 адам мерт болды. Қарсы бетке шығып кеткен жүк көлігін Өзбекстан азаматы басқарған. 
Количество показов: 17
Дата создания: 25.10.2025 08:41:49