Ырғыз ауданында болған автобус апатының себебін үкіметтік комиссия анықтап жатыр. Бұл туралы ҚР Ішкі істер министрлігі хабарлайды. Арнайы ведомствааралық комиссия апаттан зардап шеккендер мен мерт болғандардың отбасыларына жан-жақты көмек көрсететін болады. Құрамында Ішкі істер министрінің орынбасары Ерлан Тұрғымбаев, Денсаулық сақтау вице-министрі Алексей Цой, Инвестициялар және даму вице-министрі Роман Скляр, Сыртқы істер министрлігінің департамент директоры Ардақ Мәдиев, облыстың құқық қорғау және басқа да органдарының өкілдері бар. Автобус Шымкент пен Ресейдің Қазан қаласы аралығында халықаралық тасымал жүргізіп келген. Қазір қайғылы оқиғаға қатысты жан-жақты тергеу жұмыстары басталды. Көлік құралдарын басқаратын адамдардың жол жүруі немесе көлік құралдарын пайдалану қағидаларын бұзуы бабы бойынша кінәлі адам 5 жылдан 10 жылға дейін бас бостандығынан айырылуы мүмкін. Облыстық төтенше жағдайлар департаментінде арнайы штаб құрылып, жан-жақты жұмыс істеп жатыр. Құрамында облыстағы барлық департамент өкілдері бар. Психологтарға әлемнің түкпір-түкпірінен қоңырау шалып жатыр. Ақтөбеге апаттың мән-жайын анықтау үшін Өзбекстаннан арнайы ұшақ келеді. Сол елдің дәрігерлер бригадасы, Сыртқы істер министрлігі, төтенше жағдайлар министрлігінің өкілдері жетеді.