Өңірдегі астық алқаптарында егін жинау науқаны аяқталуға жақын. Биыл түсім былтырғыға қарағанда 15 пайызға артық. Облыстық ауыл шаруашылығы басқармасының басшысы Құсайын Сәрсембайдың деректеріне сүйенсек, науқан 30-шы қыркүйекке дейін бітуі тиіс. Бидай бітік шыққан Әйтеке би, Хромтау, Ойыл, Қобда, Мұғалжар, Темір, Мәртөк аудандарында диқаншылар егінді оруды аяқтап қалды. 443 мың гектар алқапқа дәнді дақылдар, 50 мың гектарға майлы дақыл, 253 мың гектарға мал азығы егілген. Сондай-ақ, 6 мың шаршы метр аумаққа картоп, 5 жарым мың гектар жерге бақша дақылдары салынған. Оның ішінде күнбағыс пен қызылша да бар. Егін науқанына 8 жарым мың тонна дизель отыны жұмсалды. Қырман басындағы астықты жинауға 1 мың 181 комбайн, мың жарымдай жүк көлігі тартылған. Жинап алынған астықты жалпы сыйымдылығы 368 мың тонна болатын 6 астық қоймасы қабылдап алып жатыр. Астықты жинап алу науқаны аяқталған соң келер жылғы егіске 170 мың гектар жер сүрілмек. Топырақтың құрамын сақтап қалу үшін 2,6 мың тоннадай минералды тыңайтқыш топыраққа енгізіледі. Арам шөптерге қарсы 163 мың шаршы метр алқапта химиялық өңдеу жұмыстары жүргізіледі.