Ұсталған адамдарды ұрып-соқты деп сотталған полицейлердің туысқандары әділдік іздейді. Бүгін облыстық сот алдына жиналған олар мемлекет басшысы Қасым-Жомарт Тоқаев пен Ішкі істер министрлігіне үндеу жасады. Былтыр 24-ші қазан күні ескі қаладағы дәмханалардың бірінде болған төбелесте патрульдік полиция қызметкерлері ешкімге қарсы күш қолданған жоқ дейді, жиналғандар.Облыстық сот алдына жиналғандардың тілегі бір. Жұмыс бабында істі болып, сотталған алты азамат ақталып шықса дейді. Бұрынғы полиция қызметкерлері былтыр қазан айының соңында темір торға қамалған. 7 айдан бері тергеу абақтысында отыр. Бес бірдей тәртіп сақшысы мен рота басшысын түрмеге тоғытқан іс былтыр орын алған. Инспекторлар мен үш қала тұрғынының арасындағы төбелес ескі қаладағы шағын дәмхана ішінде басталып, кейін сыртта жалғасады. Кешкі мезгілде қоғамдық қауіпсіздікті қадағалап жүрген сақшылар соққыға жығылдым деп полицияға қоңырау шалған бойжеткенге көмекке барған. Онымен арызданушы қыз полиция қызметкерлерін көрген бойда оқиға орнынан ізін суытқан. Ал ішімдікке сылқия тойған 3 жігіт тәртіп сақшыларын балағаттап, жағаларына жармасқан. Беттеріне түкіріп, білгендерін істейді. Намысқа тиетін сөздерді айтып, айқайлайды. Қосымша шақыртылған патрульдік құрамның көмегімен полиция бөліміне жеткізілген әлгі үшеу кейін қабырғамызды сындырды, аямай ұрып-соқты, тұншықтырды деп полиция қызметкерлері үстінен сотқа шағым түсіреді. Бірнеше ай бойы №2 қалалық сотта қаралған іске маусым айының соңында нүкте қойылады. 23 пен 30 жас аралығындағы 5 азаматтың әрқайсысы қызметтік өкілеттілігін асыра пайдаланғаны үшін 5 жылға бас бостандықтарынан айрылды. Рота бастығы қызметкерлерінің тәртіпсіздігі үшін 1 жыл 6 ай жазасын түрмеде өтемек. Сот шешімімен келіспеген туғандары облыстық сотқа шағым түсіріп отыр. 5 жылға сотталған Әлібек Асамановтың келіншегі іс біржақты қаралды, деп отыр.Облыстық сот аппеляциялық шағымды 19-шы тамыз күні қарайды. Полицейлердің ет жақындары істің онлайн қаралуына қарсы. Арнайы платформада өтетін отырыстарды даусы нашар болғандықтан тыңдау мүмкін емес дейді. 7 ай бойы бірі баласының, бірі жарының бет- жүзін көруге зар болып жүргендер заң өкілдері жанайқайымызды естіп, жазалары жеңілдетіле ме деген үмітте тарқасты.