Кеше "Ақтөбе-Астрахань" тас жолының 35-шақырымында болған жол апатына кінәлі жүргізуші қамалды. Бұл кеше түскі сағат 12-ден 15 минут кеткенде апатқа ұшыраған "Лада Ларгус" көлігі. Алдыңғы бөлігі қирап қалған. 46 жастағы жүргізушісі мен 51 жастағы бір жолаушы апат орнында қаза болды. Тағы бес жолаушы Алға аудандық орталық ауруханасына жеткізілген. Алайда ауыр жарақаттан олардың төртеуі қайтыс болды. Олар - 49, 39, 36 және 27 жастағы төрт әйел. "Лада Ларгусқа" соққан "Тойота Ипсун" көлігі Алға қаласынан Ақтөбеге қарай бет алған. Ол Армения мемлекетінің есебіндегі машина болып шықты. Ал 24 жастағы жүргізушісінің көлік басқаруға құқығы болмаған. Көлік жүргізуге құқығы болмаса да темір тұлпарды тізгіндеп, оған қоса жол ережесін өрескел бұзып, қарама-қарсы бағытқа шығып, жолаушыға толы көлікке соққан жауапсыз жігіттің әрекетінен бір емес алты отбасы қара жамылды. "Лада Ларгус" көлігінің тірі қалған бір жолаушысы ғана қазір ауруханада жатыр. Апатқа кінәлі жігіт Алға қаласының тұрғыны. Ол аяқ-қолындағы жарақаттары таңылған соң Алғадағы уақытша ұстау қапасына қамалды. Жүргізушіге қатысты қылмыстық кодекстің 345 бабы, 4 бөлімі бойынша қылмыстық іс қозғалды. Бұл бап бойынша он жылға дейін бас бостандығынан айыру жазасы қарастырылған. 7 маусым күні Байғанин ауданында да адам өлімімен аяқталған жол апаты болды. "Фольксваген-Шаран" автокөлігінің 34 жастағы жүргізушісі Ноғайтыдан Қарауылкелді ауылына қарай келе жатып, "Опель-Вектра" көлігіне соққан. "Фольксваген" көлігінің 80 жастағы жолаушысы оқиға орнында қаза болды. Тағы бес жолаушысы Байғанин аудандық ауруханасына жеткізілген. 50 жастағы бір әйел ауыр жарақаттан қайтыс болды. "Опель" көлігінің үш жолаушысы да түрлі жарақатпен ауруханаға жатқызылды. "Фольксваген-Шаран" автокөлігінің жүргізушісі уақытша ұстау абақтысына қамалды. Қылмыстық іс қозғалып, тергеу басталды.