Қаланы қоқысқа батырған "Ақжол" мекемесінің басшысы қылмыстық жауапкершілікке тартылуы мүмкін. Бүгін қалалық актив отырысында облыс әкімі Бердібек Сапарбаев қоқыс шығарумен айналысатын коммуналдық мекеменің ісі прокуратурада қаралатынын хабарлады. Көп қабатты үйлер мен жеке сектордағы тұрмыстық қалдықтарды жинаумен айналысып келген екі компания құрдымға кетіп бара жатыр. Қала әкімі Ілияс Испановтың айтуынша, "Таза қала" жекешелендірілетін кәсіпорындар тізіміне кіріп, екі рет сатылымға шығарылған. Алайда, сатып алмақ болған кәсіпкердің ақшасы жетпей, бас тартқан. Қазір коммуналдық мекеме жабылудың алдында тұр. Екіншісі - "Ақжолдың" да жағдайы мәз емес. Мекеме қаржылық қиындықтарға байланысты бірінші сәуірден бастап қоқыс шығарудан бас тартқан. Ақтөбеліктер әлеуметтік желілерде "қоқыстың астында қалдық" деп шулап жатқанда шара қолданбай, тыныш отырғандарың қалай деп облыс әкімі Бердібек Сапарбаев төтенше жағдайлар департаменті басшысы мен санитар-мамандарға шүйлікті. Екі орган өкілі де жеке кәсіпкердің жұмысын тексеруге құқығымыз жоқ деп ақталды. Қалалық әкімдік қоқыс мәселесін шешуге тырысып жатыр. Ілияс Испановтың сөзінше, қала 10 учаскеге бөлініп, 10 жаңа компания тұрмыстық қалдықтарды шығаруға жауапты болады. Қоқыс жинаушылар алдағы дүйсенбіде жұмысқа кірісуі керек. Бүгінгі актив отырысында сондай-ақ, Батыс-2, Нұр Ақтөбе аудандарындағы үйлердің сапасы, жол, автобус қатынасы, суағар жайы сөз болды. Бердібек Сапарбаев бұның бәрін халықтың әлеуметтік желілердегі шағымдарын көріп, айтып отыр.