Қаламыздағы көппәтерлі тұрғын үй алды қоқысқа толы

Есет батыр мен Әлия Молдағұлова көшесіндегі көпқабатты үй тұрғындары бірнеше жылдан бері қоқыс мәселесінен көз ашпай отырғандарын айтады. Олардың сөзінше, ауладағы қоқыс жәшіктеріне тұрғындармен қатар маңайдағы базар да қоқыс қалдықтарын тастайды. Салдарынан ауланың санитарлық жағдайы нашарлаған. Есет батыр көшесі, 109-үйдің және Әлия Молдағұлова 12-үйдің тұрғындары ауладағы қоқыс мәселесінің бірнеше жылдан бері шешілмей келе жатқанын айтады. Олардың сөзінше, контейнерлердің айналасына картон қораптар, шіріген жеміс-көкөніс қалдықтары үйіліп жатады. Тіпті ірі ағаш бұталары да бар дейді. Тұрғындардың айтуынша, бұл контейнерлерге тек көпқабатты үйдің тұрғындары ғана емес, маңайдағы "Табыс" базары мен өзге де сауда орындары қоқыс тастайды. Соның салдарынан жәшіктер тез толып, қалдықтар сыртқа шашылып қалады. 2020-2021 жылдары көшіп келген азаматтар сол уақыттан бері жағдай өзгермегенін айтады. Айтуларынша, жауапты мекеме қоқысты күн сайын әкеткенімен, бұл мәселені толық шеше алмай отыр. Себебі тұрғындар бұл контейнерлердің бірнеше үйге ортақ екенін, ал базарлардың тұрмыстық емес қалдықтары жағдайды одан әрі қиындататынын жеткізді. Олар базардың өзіне арнайы қоқыс алаңы қарастырылуын немесе аулалардағы контейнерлердің саны көбейтілуін сұрайды. Пәтер иелерінің айтуынша, маусым айында мәселе әкімдікке жеткізілген. Осыдан кейін жауапты мекемелердің қатысуымен жиналыс өткізіліп, қоқыс алаңын көшіру мәселесі талқыланған. "Назар" ПИК төрағасының айтуынша, әр үйдің тұрғындары өз пікірін білдіріп, қол жинауы тиіс болған. Ал базардан шығатын қоқысқа қатысты шағым түсіп, тұрғындар бұл деректі нақтыласа, тиісті шаралар қабылданатын еді", - дейді тұрғын үй төрағасы. Тұрғындар болса, бұл экологиялық мәселені кейінге қалдырмай, ауладағы санитарлық жағдайды жақсарту үшін нақты шешім қабылдауды талап етіп отыр.
Количество показов: 7
Дата создания: 05.08.2026 06:41:14