Қаламызда эко белсінділері марапатталды
Дүниежүзілік қоршаған ортаны қорғау күні мен Қазақстандағы Экологтар күніне арналған салтанатты шара өтті. Іс-шараға экология саласының мамандары, мемлекеттік қызметкерлер, кәсіпорын өкілдері және табиғатты қорғауға белсенді атсалысып жүрген еріктілер қатысты. Шара барысында Қазақстан Республикасы Экология министрінің және облыс әкімінің құттықтаулары оқылып, мерекелік жиын барысында өңірдің экологиялық қауіпсіздігін қамтамасыз етуге және халықтың экологиялық мәдениетін қалыптастыруға үлес қосқан азаматтар марапатталды.Қоршаған ортаны қорғау ісіне тек мамандар ғана емес, қарапайым тұрғындар да белсенді атсалысып келеді. Солардың бірі - "Велопульс Ақтөбе" қозғалысының мүшелері. Олар бірнеше жылдан бері өзен-көлдердің жағалауын тазалап, экологиялық акцияларға тұрақты түрде қатысып жүр. Қозғалыс мүшелері Елек және Қарғалы өзендерінің бойында, сондай-ақ Ақтөбе су қоймасы аумағында тұрақты түрде тазалық жұмыстарын жүргізуді қолға алған. Олардың айтуынша, табиғатты қорғау мәдениетін қалыптастыруға балалардың қатысуы да маңызды. Сондықтан экологиялық шараларға ата-аналар балаларымен бірге қатысады екен. Табиғатты қорғау саласында ұзақ жыл еңбек еткен ардагерлер бүгінгі экологиялық ахуалдың оң өзгерістерін атап өтті. Солардың бірі - экология департаментінің бұрынғы қызметкері Сергей Қасаев. Ол ауыл шаруашылығы мен экология саласында ұзақ жылдар бойы еңбек етіпті. Ардагердің айтуынша, өткен ғасырда өндіріс пен ауыл шаруашылығын дамытуға басымдық беріліп, қоршаған орта мәселесіне жеткілікті көңіл бөлінбеген. Соның салдарынан табиғатқа, ауаға, су мен жер ресурстарына айтарлықтай зиян келген. Алайда экология саласының дамуы мен арнайы мемлекеттік құрылымдардың құрылуы жағдайды өзгертуге мүмкіндік берген. Ардагер маманның сөзінше, бүгінде өңірдегі көптеген кәсіпорындар заманауи талаптарға сай жұмыс істеп, табиғатты қорғау шараларын жүйелі түрде жүзеге асыруда. Сондықтан қоршаған ортаны сақтау бағытындағы жұмыстарды тоқтатпай, оны одан әрі жетілдіру маңызды, - дейді ол.Количество показов: 9
Дата создания: 06.06.2026 02:25:50
