Қаламызда алапат өрт салдарынан 5 отбасы үйсіз қалды. Әуе қалашығы ауданындағы №7 екі қатарлы тұрғын үйде тілсіз жау маусымның 12-сінен 13-іне қараған түні тұтанған. Аз уақыттың ішінде өрт 12 пәтердің бесеуіне жайылып үлгерген. Абырой болғанда зардап шеккендер жоқ. Алайда мүліксіз, тіпті киімсіз далада тентірегендер арасында кешелі-бері нәр татпағандары бар. Барынан айрылғандарға жергілікті әкімдік көмек көрсете ме? Екі қатарлы, 12 пәтерлі үйдің бес пәтері адам тұрмастай хәлде. Әп-сәтте, дүние-мүлік, құжаттарынан айырылғандардың барар жері жоқ. Баспанасыз қалған тұрғындарының тұрмыстарын енді қайта көтеруге шамалары жоқ. Зейнеткер Александрдің қазір қалада барып паналар танысы да жоқ. Оның сөзіне сүйенсек, 3 күннен бері қарт қираған пәтерін паналауда. Пәтерінің төбесі опырылып түскен. Қиын жағдайға тап болған ақтөбеліктер қайырымды жандардан көбірек қолдау көргенін айтады. Тілсіз жаудан зардап шеккендер арасында Ксения Русинаның да туыстары бар. Ол әлеуметтік желі арқылы ақша қорын ашқан. 3 күн өтсе де үйге материалдық шығынды есептеу комиссиясының келмегенін айтады. Белгілі болғандай, үйді қайта қалпына келтіруге бюджеттен қаржы қарастырылмаған. Алайда алдағы уақытта қалалық резервтен ақша бөлінеді. Оған үйдің шатыры мен подъезд жөнделеді. Өрттің неден шыққаны белгісіз. Жалын 200 шаршы метр аумақты шарпыған. Оқиға болған жерде қазір тексеру жұмыстары жалғасып жатыр. Ал көңілі қаяу тұрғындар қайырымды жандардан көмек сұрайды. Себебі тұруға жарамсыз пәтерлерді қайта жөндеу қажет. Ал оған қомақты қаржы керек. Сол себепті зардап шегушілер жомарт жандардың көмегіне зәру.