Қалада жылу беріле бастады
Бүгін аймақта жылу беру маусымы басталды. Әлеуметтік нысандар, яғни мектеп, балабақша, интернаттар мен ауруханаларға таңмен жылу қосылған. Биыл жылу маусымына дайындық көктемнен басталған. Инженерлік желілердің ақаулары жөнделіп, тұрғын үйлердің жылу жүйелері сынақтан өткізілген. Бүгінгі күні 97 қазандыққа ағымдағы жөндеу жүргізіліп, алтауы күрделі жөндеуден өтті. Қайта жаңғырту бағдарламасы аясында тағы 6 қазандыққа күрделі жөндеу жүргізіліп жатыр. Шенділердің мәліметінше, Ақтөбеде 2100 көпқабатты үй бар. Оның 1500-ден астамы «Aqtobe Su-Energy Group» АҚ-ның орталықтандырылған жылу жүйесіне қосылған. Қалған 544 үй автономды жүйелер мен жеке құрылысшылардың қазандықтары арқылы жылумен қамтамасыз етіледі. Шаһарда барлығы 130 қазандық жұмыс істейді, оның 27-сі - «Aqtobe Su-Energy Group»-тың теңгерімінде, ал қалғаны - басқарушы ұйымдардың меншігінде. Тұрғындар кейбір үйлерге жылу бірден жетсе, енді біріне кезең-кезеңімен беріледі дейді. Ал, жауапты мекеме өкілдері мұның техникалық процесс екенін түсіндірді. Бірнеше күн ішінде барлық үйге жылу толық жеткізілетінін ескертті. Қысқы маусым – әрқашан үлкен сынақ кезеңі. Бірақ дайындықты ерте бастаған қала қыстың суығына қамсыз емес екенін көрсетті. Енді алдағы уақытта жылу үздіксіз берілуі үшін коммуналдық қызметтер тәулік бойы жұмысын жалғастырады. Тұрғындар да өз кезегінде үй ішіндегі жүйелердің дұрыс жұмыс істеуін қадағалап, энергияны үнемдеп пайдалану арқылы ортақ іске үлес қосуы тиіс. Қала билігі мен коммуналдық мекемелердің айтуынша, қыс қаншалықты қытымыр болса да, тұрғындардың қауіпсіздігі мен жайлы өмір сүруі басты назарда болады.Количество показов: 29
Дата создания: 02.10.2025 09:33:34
