Қалада жолаушы тасымалы қызметі мүлдем нашарлап кетті. Кеше балалар мерекесінде автобус күтуден шаршаған тұрғындар такси жалдап шығынданғандарын айтып шағымдануда. Арнайы электронды төлем картасын алып үлгермеген зейнеткерлердің де айтары көп.Қоғамдық көлік қызметінің жұмысы бүгін ғана ретке келе бастады. Ал, кеше аялдама толы жолаушылар автобустарды сағаттап күткенін айтуда. Балалар мерекесінде такси ұстаудың өзі оңай болмаған. Жолақы да шарықтап кетіпті. Әлеуметтік желіде тұрғындар электронды карталары жоқтардан кондукторлар әртүрлі ақы алғандығын жазды. Автобус жүргізушілері де жолаушылар тарапынан жолақыға қатысты түсініспеушіліктер болып жатқанын жасырмайды. Электронды жол картасын алып үлгермегендер әлі көп көрінеді. Бірақ, олар тәртіпке бағынбай, қолма-қол 150 теңге төлеуден бас тартады. Тұрғындар аялдамаларда автобустарды ұзақ күтетіндерін айтып шағымдануда.