Шаһарымызда көлік саны өсіп жатыр. Ал тұрғындардың алаңсыз қозғалысы үшін жерүсті өткелдерінің пайдасы мол. Алайда мұндай аспалы көпірлердің де өз стандарты бар. Ол түнгі уақытта жарықпен қамтамасыз етілуі керек. Мүмкіндігі шектеулі жандарға пандус пен лифт болуы шарт. Ақтөбедегі жерүсті өткелдерінің бүгінгі жағдайы қандай? Ақтөбеде халық саны жыл санап көбеюде. Жер аумағы да кеңейіп келеді. Құрылыс қарқыны да қызу жүріп жатыр. Шаһарымызда үш жерүсті өткелі бар. Оның екеуі Ә.Молдағұлова даңғылында орналасқан. Үшіншісі 12-ші мөлтек ауданында тұр. Мұндай аспалы көпірлердің мақсаты тұрғындардың қауіпсіздігін қамтамасыз ету, жаяу жүргіншілердің қатысуымен болатын жол апаттарының алдын алу. Қаладағы үш жерүсті өткелінде де мүгедектерге арналған лифт жасамай тұр. Бұл биіктігі 6 метрді құрайтын мұндай өткелдерді мүгедектерден бөлек егде жастағылар мен балалы адамдар қолдана алмайды деген сөз. Түнде жарықшамдары сөнулі тұрады, дейді тұрғындар.Түнгі мезгілде жерүсті өткелімен өту қауіпті. Аспалы көпірлердің санитарлық және техникалық жағдайын кім қадағалайтыны белгісіз. Қалалық тұрғын-үй коммуналдық шаруашылық, жолаушылар көлігі және автомобиль жолдары бөлімінің жауапты мамандары бұл сұраққа жауап беруден бас тартты.