Өңірде коронавирус індетін жұқтырғандардың 92 пайызы сауығып шықты. Бұл туралы бүгін облыс әкімдігінде өткен аппарат отырысында белгілі болды. Облыс әкімінің орынбасарлары, департамент, басқарма басшылары мен қала, аудан әкімдері қатысқан жиында өңірдегі эпидемиологиялық ахуал, ғарыштық мониторинг кезінде анықталған заңсыз қоқыс алаңдары туралы сөз болды. Облыс әкімінің бірінші орынбасары Нұржауған Қалауов коронавирусқа қарсы қабылданған шаралардың арқасында аурушаңдық деңгейінің төмендегенін жеткізді. Өңірде індет жұқтырғандардың 92 %-ы емделіп шыққан. Жедел жәрдем қызметіне тәулігіне түсетін қоңыраулар 2 600-ден 700-ге дейін төмендеді. Коронавирустың екінші толқыны орын алған жағдайда жан-жақты дайындықтар жүргізілуде . Дәріхана желілерін 2 айға жететін дәрі-дәрмекпен қамтамасыз ету, бағаларды 10% - дан асырмау жөнінде жұмыстар жасалды. Қазіргі уақытта облыста 367 дәріхана және 12 қойма жұмыс жасайды. Карантин режимін сақтамау бойынша 680 құқық бұзушылық анықталып, 363 тұлғаға 41,6 млн теңгеге жуық айыппұл салынған. Ал, мемлекет басшысы Қасым-Жомарт Тоқаевтың заңсыз қоқыс алаңдарын 1 ай ішінде жою туралы тапсырмасы аудандарда толық орындалған. Аймақ басшысы Оңдасын Оразалин қала аумағындағы осындай жерлерді толық тазарту үшін қалабасы Асхат Шахаровқа 1 апта уақыт берді.