Қаламызда неке сарайы ашылды. "Қазақ халқына мың алғыс" монументінің жанына орналасқан сарай екі қабатты. 4 түрлі залы бар. Аса жоғары талғаммен салынған ғимарат мемлекеттік-серіктестік аясында бой көтерген. Құрылтайшысы - Зәмзәгүл Баймағамбетова. Кәсіпкер неке сарайының құрылысына 1,2 миллиард теңге жұмсаған. Бүгін жаңа неке сарайында қос жұп неке куәліктерін алды. Солардың бірі - Дарын мен Әйкерім Төрахметтер. 19 бен 20 жастағы жұбайлардың тойлары ертең. Өмірлеріндегі ең керемет сәттің бүгінгі шараға тап келгеніне бақытты.
Ал, Хамза Тоққожин мен Майра Мұхамбеталинаның отандасқандарына 50 жыл толды. 3 баласынан 6 немере сүйіп отырған бақытты отбасы. Алтын тойға бірлік пен ынтымақтың, сыйластықтың арқасында жетік дейді үлгілі жұп. Бүгін алтын және зүбәржат тойларын тойлаған Хамза Тоққожин мен Майра Мұхамбеталина, Орынбасар мен Гүлнәзен Дәуленбаевтарға және жас жұбайларға мемлекеттік хатшы Гүлшара Әбдіхалықова арнайы сыйлықтарын табыстады. Неке сарайы ертеңнен бастап халыққа қызмет көрсетеді. Мамандардың сөзінше, жазда отау құрушылар саны екі есеге артады. Бір жылда 4,5 мыңнан астам жұп неке қиса, соның жартысы маусым мен тамыз айларында. Дегенмен, ажырасушылар саны да азаймай отыр. Неке қиған жұптың 30 пайызға жуығы ажырасып кетеді.