Шаһарда 1 397 жер учаскесі пайдаланылмай жатыр. 300-ден көбі тұрғын үй салу үшін жеке тұлғаларға берілген. Бүгін қала әкімі Ілияс Испанов 2016-2017 жылдары Қызылжар елді мекенінен берілген жер учаскелерін түгендеді. Қызылжар тұрғын массивінде игерілмей жатқан әзірге 5-6 жер бар. Бүгін қала әкімі Ілияс Испанов қалалық жер қатынастары бөлімінің басшысымен бірге сол жер учаскелерін аралап көрді. Барлық коммуникация тартылып, жағдай жасалғанымен жер иелері құрылысты бастауға әзір асығар емес. Жерді мақсатты пайдалану уақыты аяқталуға жақын. Қызылжар ауылындағы мына жердің иесі бүгінгі кездесуге шақыртылған. Алайда, келмеді. Дегенмен, жергілікті билік өкілдері тағы 3 ай мерзім береміз деп отыр. Ескерту жасалған. Қала бойынша биыл 1490 гектарға жуық жер учаскесі қайтарылған. Қаладағы 21 тұрғын массиві бойынша мақсатты пайдаланылмай жатқан жер учаскелерінің саны 1400-ге жуық. 360-ы жеке тұрғын үй салуға берілген. 680-ге жуығы жалға берілген жер телімі. 350-ден көбінің құжаттары рәсімделмеген. Себептері түрлі. Құрылысы басталмаған, басталса да аяқталмаған жерлерді иесі өзгеге сата алмайды. Баспанасын 100 пайыз тұрғызғаннан кейін ғана жекенің атына өтеді. Былтыр кезекке тұрғандардың 10 300-ден астамы Бауырластар-3, Думан, Жаңақоныс2,3,4, Парасат тұрғын массивтерінен жер учаскесін алған. Биыл 2006 жылдың қараша, желтоқсан айларында кезекке тұрған ақтөбеліктерге жер беріледі. Оларға жер учаскелері Бауырластар-5 тұрғын массивінен бөлінген. 2003 жылдан бері бүгінге дейін 135 355 қала тұрғыны жер кезегіне тұрған.