Қаладағы жас натуралистер стансасы бағымындағы аққулардың саны тағы бір көгілдірмен толықты. Аққудың балапанын басқа қаладан Ақтөбеге қонаққа келген жігіт тауып әкеліпті. Қанаты зақымданған құс қазір станса мамандарының қарауында. Кеше ғана осы жерге жеткізілген аққудың балапанын жас натуралистер стансасындағылар Көркем деп атауды ұйғарыпты. Алғашында ол бұл жерді жатырқап, тыпырлап, мазасыз күй кешкен екен. Мұндағы қолға үйретілген екі ересек аққудың қасына қосқанда ғана ол тыныштық тапқан. Станса мамандары аққудың көгілдірі қанатынан жарақат алғандықтан, ұша алмай қалып қоюы мүмкін дейді. Мұндағы үш аққудың барлығын да біреулер тауып алып, осы жерге алып келген. Үшеуі де қанатынан жарақат алған құстар. Жасы жағынан үлкен ақ түсті құсты мұнайшылар өндіріс орнынан тауып алған екен. Алғаш жеткізілген екі аққу бір біріне бауыр басып қалыпты. Бірінсіз бірі тұра алмайды, дейді станса мамандары. Ал қатарға кеше ғана қосылған Көркемді де олар жылы қабылдапты. Құстарға азық табу қиын емес. Дегенмен жыртқыш құстарға беретін ет таба алмай қаламыз, дейді табиғат жанашырлары.Жас натуралистер стансасының мамандары жараланған аққулардың қанаттарын таңып, өздерінше ем- дом жасаған. Бірақ, олар ұшуға әлі дайын емес. Мұндағы қызметкерлер негізі аң -құстарға нақты көмек көрсете алатын ветеринар-дәрігерлер Ақтөбеде жоқ екенін айтады.