Бүгін "Ақтөбе - адалдық алаңы" жобалық кеңсесі қызметкерлері қаладағы терможаңғыртудан өткен үйлерге мониторинг жұмыстарын жүргізді. Үш жыл бұрын қайта жөнделген ғимараттардың сапасы сын көтере ме? Тұрғындардың қаражатына күрделі жөнделген үйлердің қазіргі жағдайы қалай? Жеңіс даңғылындағы №10-шы үйге екі жыл бұрын қайта жаңғырту жұмыстары жүргізілді. Жетпіс жыл бұрын пайдалануға берілген үйдің қазіргі қасбеті керемет. Тұрғындар атқарылған іске ризашылықтарын білдірді. Тек қасбетінің кейбір жерлері құлап тұр. Ол да назардан тыс қалмай, жауапты орындарға ауызша түрде ескертілген. Үш жылға кепілдік берілетін жөндеудің несиесін пәтер иелері 15 жыл бойы төлейді. Сондай-ақ, тұрғындар кейбір мәселелер ескерусіз қалатынын жасырмады. Жеңіс даңғылындағы №10 үйдің тұрғыны Қайырбек Есмұқанов терможаңғырту жұмыстарының басы-қасында болған. Оның айтуынша, жөндеуді қажет етпейтін жерлер қайта жаңғыртылып, бұл тұрғындардың қалтасына күш түсірген. Сондықтан, олар кез келген жұмыс пәтер иелерінің келісімімен жасалуы тиіс деп есептейді. Ал терможаңғырту бағдарламасының үйлестірушісі "Табыс-Ақтөбе" ЖШС-нің өкілі Талғат Өтепов көп жағдайда тұрғындардың арасында келіспеушілік жиі болатынын айтты. Маманның пікірінше, жүргізілген жұмыстан кейін анықталған кемшіліктер міндетті түрде қалпына келтіріледі. Ал кей жағдайларда ауа райына байланысты кейінге қалдырылатын мәселелер бар. Қазір терможаңғыртумен күрделі жөнделу үшін қалада 70 үй кезекте тұр. Жыл басынан бері мұндай 15 үйге мониторинг жұмыстары жүргізілген. 2018-2019 жылдары терможаңғыртудан өткен үйлер қаралды. Алдағы уақытта бұл жұмыстар жалғаса береді. Әзірге мердігерлер тарапынан кеткен ірі кемшіліктер анықталған жоқ. Тек тұрғындардың өздері үйді күтіп-ұстай алмайтындығы байқалып отыр. Атап айтар болсақ, кіре-берістерді бүлдіру, жарық құрылғыларының сындырылуы, ұсақ вандализм сияқты көріністер кездеседі. Өшіп қалған жарық пен сынған кафельді тұрғындар өзара келісіп, өздері жөндейді.