Бүгін шаһар басшысы Мавр Абдуллин көшпелі баспасөз мәслихатын өткізді. Қаладағы бірнеше нысанды аралап, атқарылып жатқан жұмыстармен таныстырды. 12 шағын аудандағы №51 мектептің алдындағы жол орташа жөндеуден өтті. Тұрғындардың бірнеше жылғы мәселесі шешілген. "Ерхат жолдары" мердігер мекемесі көлік жолын асфальттап, жүргіншілер жолын салған. Жиектастар төселген. Жоба құны - 68 млн. теңге. Жөнделген жердің ұзындығы 423 метр. Алда шаһардағы 40 жолды жөндеу жоспарланған. Қала әкімінің сөзінше, жөнделген жолдармен бірге суағарлар, жүргіншілер жолы мен жиектастар бірден салынады. Қазір облыс орталығындағы жолдардың 50 пайызы асфальтталған. Келесі жылы Ясный елді-мекені, Заречный аудандарындағы жолдарды жөндеу жұмыстары жалғасады. Одан кейін қала әкімі Сәңкібай батыр даңғылы бойындағы 12-шағын ауданның айналма жолынан Ә.Молдағұлова даңғылына дейінгі автомобиль жолын қарап көрді. 2009 жылы соңғы рет күрделі жөнделген. 2020 жылы даңғылдың 3 шақырымы қайта жаңартылады. Жаңарту жұмыстарына 1,62 млрд теңге қарастырылған. Сәңкібай батыр даңғылындағы айналма жол кеңейтіліп, Ғ.Жұбанова көшесіне дейінгі бөлігі 4 жолақты, ал Ғ.Жұбанова көшесінен Ә.Молдағұлова даңғылына дейінгі бөлігі 6 жолақты болады. Ал, жолдардың құрылысын бастап, бірақ, аяқтамай тастаған компаниялар қазір анықталып жатыр. Шаһар басшысы қазір өзекті қоқыс мәселесіне де тоқталды. 3 компания қаланы қоқыстан артылтумен айналысады. Әкімнің сөзінше, қоқыстарды бөліп қабылдайтын арнайы бекеттер ашылған. Олар қала бойынша әзірге төртеу. Оған қоса, габаритті емес қоқыстарды салу үшін де №51 мектеп-гимназиясының маңына арнайы жәшік орнатылған. Тағы бір өзектілігі жоғары мәселе — құлағалы тұрған ескі үйлер. Облыс орталығында мұндай 17 көп пәтерлі тұрғын үй бар. 500-ден көп ақтөбелік тұрады. Қалалық әкімдік мәселені шешуге кіріскен. Жаңақоныс ауылында 250 пәтерлі көпқабатты 5 үй салынады. Мердігер мекеме - «Жастар Құрылыс компаниясы» ЖШС-і. Құрылысы аяқталысымен ескі 17 үйдің тұрғындары Жаңақонысқа көшіріледі.