Нұр-Ақтөбе, Батыс, 11, 12-ықшам аудандарда жаңбыр суын жинайтын арықтар жүйесі салынады. Жобалық-сметалық құжаттары дайындалып жатыр. Батыс-2 ауданында суағарлар жасауға 31 миллион теңге бөлініп те қойған. Бұл туралы бүгін шаһар басшысы Ілияс Испанов айтты. Ол облыстық мәслихаттың тұрақты комиссиясы алдында қаланың жолдары мен суағар жүйелері жайында есеп берді. Қалада 647 шақырым жол бар. Оның жартысы жөндеуді қажет етеді. Биыл көлік жолдарын реттеуге бюджеттен 3 миллиард теңге бөлінгені белгілі. Қала әкімі Ілияс Испановтың айтуынша, бұл ақшаға 39 көшеде жөндеу жұмыстары қолға алынды. Жаз бойы жөнделіп жатқан жолдар әлі де бітер емес. Былтыр ғана жөнделген көшелердегі асфальтты суағарлардың жоқтығынан жаңбыр суы бүлдіріп жатыр, дейді әкім. Сол себепті, биыл арықтар салуға ден қойылды. Тайбеков, Оспанов, Ғазиза Жұбанова, 101 атқыштар бригадасы, Иманов, Пацаев, Пожарский көшелерін жөндеу кезінде жаңбыр суын жинайтын құдықтар мен суағарлар салынады. Ал, бұрыннан бар арықтарды тазалап, күтіп-ұстауға 16 миллион теңге бөлінген. "Тазалық" мекемесінің жұмысшылары Некрасов, Ломоносов, Уәлиханов, Алтынсарин және Зауыт көшелеріндегі ашық арналар мен су жиналатын құдықтарды құм мен қоқыстан тазартып жатыр. Жабық арналарды тазалау қиынға соғып тұр.  Жиында жолаушылар көлігінің жұмысы да сөз етілді. Автобустардың қозғалысын қадағалау үшін GPS-навигатор қызметі пайдаланылмақ. Қалада осы жылы жаңадан алты аялдама бекеті салынып, 12 павильон жаңартылған. Жыл соңына дейін 25-і жасалады. Әрі оларға вай-фай қызметін қосу жоспарда бар.