Қаладағы көп қатарлы тұрғын үйлердің аулаларын абаттандыру қайта жалғасады. Бұл жұмыстар биыл Шанхай, Тұрғындар қалашығы, 8-шағын аудан және қаланың орталық бөлігіндегі 100 аулада жүргізіледі. Үлгі ретінде 11-ші ықшам ауданда аумағы ең үлкен аула алдымен абаттандырылады. Көлік тұрағына дейін асфальтталады, жарықтандырылады. Балалар ойын алаңы, стритворкаут пайда болады.Қалада көлік жолдары жөнделе бастады. Қалаішілік көлік жолының жалпы ұзындығы 651 шақырым. Оның 300 шақырымы асфальтталған. Биыл 97 көше жөнделеді. Оған 1 миллиард теңгеге жуық қаржы бөлінді. Ал 101-ші атқыштар бригадасы көшесінде арбат пайда болады. Ол кезде көшеде жаяуларға жол беріліп, кешкі сегізден бастап таңға дейін көлік қозғалысы тоқтайды. Жобаны жүзеге асыру жұмыстары басталып кеткен. Пушкин атындағы саябақты абаттандыруға қатысты да бұған дейін дәл осындай көркем жоба таныстырылған еді. Алайда қалалық әкімдік жекенің қолындағы жерді әлі мемлекет меншігіне қайтара алмай отыр. Тұңғыш президент атындағы орталық саябақтың тоғанына биыл да су келмейтін сыңайлы. "Керуен" сауда-ойын сауық орталығы алдындағы сулы-жасыл гүлзардың жайы айтпасақ та күнде көз алдымызда. Бұрын Сазды өзенінің суымен толтырылып жүрген арық соңғы жылдары кеберсіп тұр. Қаланы сәндеуге су жетпесе де, саяжайларды ылғалсыз қалдырмаймыз деп отыр әкім. Жуық арада 8 субұрқақ іске қосылады. Қалған 14-і күрделі жөндеуді қажет етеді. Бюджеттен ол мақсатқа 50 миллион теңге бөлінген. Мемлекет пен жекеменшік серіктестік аясында көшелерге жарықшамдар орнату бойынша келіссөздер жүріп жатыр. Ал қала сыртындағы заңсыз қоқыс алаңдарын жоюға 260 миллион теңге бөлінген. Мердігерлер арасында конкурстық рәсімдер жүріп жатыр. 375 ретсіз қоқыс алаңы пайда болған. Бұл орындарда шамамен 200 мың текше метр қатты тұрмыстық қалдықтар жиналып қалған. Бұдан бөлек бүгінгі баспасөз мәслихатында Асхат Шахаров 295 миллиард теңгеге 100 мың тұрғынға арналған заманауи "Батыс-3" ауданының тұрғызылып жатқанын, алдағы уақытта қоғамдық көліктердің қозғалысын смартфондарымыз арқылы бақылау мүмкіндігіне ие болатынымызды, жасыл желек қорының көбейетіні туралы да айтты.