Заречный 1, 2, 3, 4 атаулары өз кезегінде Сығанақ, Сарайшық, Тұран, Күлтегін болуып өзгеруі мүмкін. Ал Оңтүстік-Батыс аудандарына Абылай хан, Хан тәңірі атауы беріледі. Бұл ұсынысты бүгін қалалық әкімдік шағын аудан тұрғындарына жеткізді. Қоғамдық қабылдауға көше атауларын бекітетін қалалық мәслихат депутаттары қатысты. №61 орта мектепке Заречный-3 ауылының тұрғындары жиналды. Бұл ауыл болашақта Тұран аталуы мүмкін. Ал Заречный 1-ге Сығанақ, Заречный 2-ге Сарайшық, Заречный 4-ке Күлтегін атауы таңдалды. Жергілікті тұрғындармен кездесуді бастаған топ Заречный-3 елді мекеніне Ақжол, Алтыбақан, Өнеге, Арғымақ, Ғибадат, Базарлық, Отан секілді бірнеше  атауды ұсынды. Мұндайда дөкейдің әкесі мен көпшілік білмейтін адамның  есімі  берілмейді. Себебі, Тәуелсіздіктің 25 жылдығына орай бір реттік ұлттық атау беруге мүмкіндік жасалған. Ал Сельмаш ауданын Достық, Сельмаш-2 ауданын Ақ Отау деп атау ұсынылды. Барлығы 83 көше мен 9 елді мекеннің аты жаңарады. Қазір  әкімдік өздері таңдаған атауды халыққа таныстырып жүр. Егер қоғамдық қабылдауға қатысқан тұрғындар келісім берсе, қалалық мәслихатта бекітіледі. Кейін республикалық ономастикалық  комиссия қарап, соңғы нүктені облыстық мәслихат қояды. Жергілікті әкімдік өкілдері, көше мен елді мекен атауы өзгерген кезде үйдің техникалық төлқұжаты тегін өзгертілетінін жеткізді.