Қалада тоғызқұмалақтан VI әлем чемпионаты өтуде. Өнер орталығы ғимаратында кеше басталған дүниежүзілік дода 27-қарашаға дейін жалғасады. Қаламызда тұңғыш рет өтіп жатқан әлем чемпионатында Қазақстаннан бөлек АҚШ, Ауғанстан, Бангладеш, Қытай, Қырғызстан, Әзірбайжан, Өзбекстан, Түркіменстан, Түркия, Моңғолия, Үндістан, Пәкістан, Ұлыбритания, Германия, Чехия, Колумбия, Латвия секілді 20-ға жуық шет мемлекеттен 80 спортшы бақтарын сынауда. Тоғызқұмалақ жарысының классикалық түріне - 40 спортшы, блицке - 40 және рапид түріне 80-ге жуық ойыншы қатысады. Төрт мың жылдық тарихы бар қазақ халқының ұлттық ойыны бойынша бақтарын сынауға барлығы 22 мемлекеттен спортшылар келген. VI Әлем чемпионатының бас төрешісі Бауыржан Төлегенов таяуда ғана Латвияда тоғызқұмалақты ойнап үйренудің оқу-әдістемелік құралының тұсауы кесілгенін атап өтті. Қатысушылардың арасында Қырғызстаннан келген ойыншылар да бар. 9 ойыншы мен 2 жаттықтырушыдан жасақталған құрама аталған чемпионатта жеңіске жететіндеріне сенімді. Облыстық дене шынықтыру және спорт басқармасы жеңімпаздар мен қатысушыларға арнайы сыйлықтар, ақшалай сыйақылар, "Алғыс хаттар" , кубоктар мен медальдар әзірлеген. Еске салайық, Қазақстан Республикасы Тоғызқұмалақ спорты Федерациясының шешімімен 2020-2021 жыл қорытындысы бойынша «Ең үздік жергілікті федерация» номинациясына Ақтөбе облысы ие болған болатын.