Қалада пәтер жалдап тұрып жатқан студенттер қиын жағдайда қалды. Өйткені баспананы жалдау ақысы аяқ астынан бірнеше есе қымбаттап шыға келді. Оның бірден бір себебі қаламызға көрші Ресей азаматтарының ағылуы. Мигранттар қанша теңгеге болса да пәтер жалдауға әзір. Сұраныс артқаннан кейін осы бизнестегілер өз пайдасын ойлап бағуда. Бұл әсіресе ал ауыл-аймақтан білім қуып келген өз жастарымызға соққы болды. Өңірдегі ірі жоғары оқу орындарының бірі Қ.Жұбанов атындағы Ақтөбе өңірлік университетінің студенттері пәтер жалдау ақысының күрт қымбаттағанын айтып, аталған оқу орнының ректорынан жатақханадан орын беруін сұраған. Осыдан кейін баспанасыз қалған 32 жастың 30-ы жатақханаға орналастырылды. Қалған 2-еуі қала сыртындағы туыстарының үйінен қатынайтын болып шешті. Қазіргі таңда жоғары оқу орнында 13 046 студент білім алуда. Оның 44 пайызы қала тұрғындары, қалғаны ауыл-аймақтан немесе басқа қаладан оқуға келген студенттер. Қалада тұратын жері жоқ студенттердің 12 пайызы жатақханамен қамтамасыз етілген. Студенттер үйінде 2200-ге жуық орын бар. Оның 1800-ге жуығы білім алушыларға қолданысқа берілген. Жалға берілетін пәтерлер құнының өскенін анық білу үшін пәтер иелеріне хабарласқан болатынбыз. Олар екі бөлмелі пәтерді бір күнге жалға беру үшін 50 мың теңге сұрайтындарын және бұл тұрақты баға екенін айтты. Тіпті қазақстандықтарға да жеңілдік жоқ көрінеді.Облыста 4 жоғары оқу орны бар. Қаладан тыс жерлерден келген 8 мыңға жуық студент білім алады. Қазіргі таңда оқу орындарында 4 580 орындық 12 жатақханада 3 422 студент тұрып жатыр. Өңірдегі жоғары оқу орындарының ректорлары қандай да бір себеппен баспанасыз қалған студенттерге хабарлама таратты. Қазірдің өзінде Қ.Жұбанов атындағы Ақтөбе өңірлік университетінің жатақханасында 581 орын, М.Оспанов атындағы Батыс Қазақстан медицина университетінің жатақханасында 345, С. Бәйішев университетінде 147, қазақ-орыс халықаралық университеті жатақханасында 16 орын студенттер үшін бос тұр.