Ақтөбелік көлік жүргізушілері көгілдір отыннан әлі таршылық көріп отыр. Жергілікті билік өкілдері мәселе шешіліп, жағдай дұрысталады дегенімен газ құю бекеттерінде газ тапшы. Қалалықтар көгілдір отынды тек талонмен ғана алып жатыр. Ал, кей бекеттерде бағасы аспандап тұр. Шаһардағы газ тапшылығы тамыз айында туындаған. Мәселені уақытында шешеміз деген жергілікті билік өкілдері қауқарсыз отыр. Салдарынан ақтөбелік көлік жүргізушілері темір тұлпарларын газбен толтыра алмай қиналып жүр. Қазір кейбір газ құю бекеттерінде жұмыс жоқтың қасы. Көгілдір отын болмағандықтан, тұтынушы да жоқ. Мекемелердің көліктері ғана талон бойынша сұйылтылған газ құйдырып жүр. Жеке жүргізушілер автокөліктерін жанармаймен толтырады немесе газды қымбатқа сатып алады. Жазда билік өкілдері газдың тапшылығын "ҚазақОйлАқтөбе" ЖШС мен "СНПС Ақтөбемұнайгаз" АҚ секілді өндіруші зауыттардың жоспарлы жөндеуден өтуімен түсіндірген еді. Алайда, екі зауытта жұмысын бастады. Бірақ, нәтиже жоқ. Тамызда келісім шарт бойынша газ құю бекеттерінің 30 пайызы талон бойынша жұмыс істеп тұрды. Күнделікті 420 тонналық 12 вагонмен сұйылтылған газ жеткізілді. Былтыр газбен жүретін көліктер саны 39 мың болған. Биыл олардың саны 47 мыңға жеткен.