Бүгін облыстық табиғи монополияларды реттеу департаменті "Aqtobe su-energy group" акционерлік қоғамымен бірге "Төменгі Қарғалы су алу стансасының сорғы бекетінде" болды. Аталған нысанда инвестициялық бағдарлама шеңберінде күрделі жөндеу жұмыстары жүріп жатыр. Онда жалпы ұзындығы 1013 метр, диаметрі 600 мм болатын су құбырын ауыстыру жоспарланған. Жүргізілген тәуелсіз сараптамалық бағалау нәтижесінде қаладағы су құбырларының 47,5 пайызы, кәріз желілерінің 78,2 пайызы тозғандығы анықталды. Сондықтан, "Aqtobe su-energy group" АҚ-ның су және су бұру құбырларын жаңғырту, қайта қалпына келтіру және күрделі жөндеу бойынша бекітілген инвестициялық бағдарлама шеңберінде облыстың табиғи монополияларды реттеу департаменті 2016-2020 жылдарға 10,81 млрд теңге инвестиция бөлген. Оның ішінде ағымдағы жылға 1,2 млрд теңге қарастырылған. Оның 514,9 млн теңгесі сумен жабдықтауға, 681,3 млн теңгесі су бұру қызметіне арналған. Аталмыш бағдарламаны жүзеге асыру аясында бүгін департамент мамандары "Төменгі Қарғалы су алу стансасының сорғы бекетінде" болды. Мұндағы жөндеу жұмыстары аяқталуға жақын. Атап өтейік, бұл нысаннан бөлек аталмыш инвестициялық бағдарлама аясында қала атмосферасының тазалығы үшін неғұрлым ластанған ағындылары бар және тұрғын аймақтарда орналасқан 11 кәріздік сорғы бекеттерінде ауа тазалағыш желдеткіштерді қайта құру жұмыстары жүргізілуде.